卵雞場疑偷排廢水汙染埤仔 嘉義縣府當稽查

嘉義縣大林鎮有民眾投講,徛家附近有蛋商的畜牧場偷放廢水,造成IN淹田用的埤仔優養化真嚴重。嘉義縣政府成立聯合稽查小組,5/20開始佇畜牧場排水口裝監測設備,嘛全面檢查排水管路佮水質。社區要求講,若三個月以後閣無法度達到合法排放的標準,這間畜牧場應該愛共撤照。

環保局人員軁入去排水溝內底,欲來取樣水管的水質,對20開始,嘉義縣政府農業處佮環保局,就會無定時來大林這間畜牧場稽查,因為附近社區檢舉IN講,排出來的水造成汙染。

嘉義縣副縣長 劉培東指出:「IN的廢汙水的狀況,其實阮閣會無定時來檢查,目前已經佇附近的水內底裝設自動的水質檢測,而且下晡會佇in工課的時陣閣來做檢查」

五甲外的埤仔,水芋仔湠甲滿滿是,里長講這窟埤仔是邊仔百外公頃田園的灌溉用水,這馬優養化嚴重,攏是因為這間蛋商的畜牧場造成的。

嘉義縣大林鎮上林里長 陳煦湘表示「上游汙染、排水落來,造成阮彼个灌溉用水優養化,優養化了就是講In水排出來變臭矣。而且內底啥物成份咱嘛毋知,有的咱嘛無清楚,時到規片汙染落去的時陣,規片的農作物攏去矣,阮遮的農民欲食啥」

里長講,對古早無自來水的時代,這窟埤仔就提供庄內民生用水,進前嘛是復育嘉義青虳的所在,希望縣政府重視排水佮埤塘環境衛生的問題。若三個月以後,畜牧場的排放水閣無法度符合標準,應該愛共撤照。

全台敬老金大調查

相關新聞