網路店.工研院做竹仔環保產品 推新竹循環經濟
張君豪 / 新竹報導
發布時間：
更新時間：
根據農委會資料，新竹縣的竹仔是全臺灣出產上濟的所在。電商平台看著這點，佮專門做環保餐具的業者閣有工研院合作，欲佇新竹縣成立竹仔纖維環保產銷鏈，欲製造臺灣出品的綠色產品。
竹仔生長快速，竹林仔除了會當吸收碳量，而且平均四冬就會使生產出環保材料。以竹仔做原料，除了葉仔會當製造清潔用的產品，竹枝做環保餐具、欶管，會使講規支竹仔100%攏用會著。
工研院中分院執行長 黃新鉗：「譬如講做生物炭，會使改善塗壤的品質；抑是進一步轉化做保鮮材料，食品的保鮮材料，譬如講弓蕉的保鮮，攏會使來應用。所以竹仔是全循環誠好的材料。」
以竹仔所做出來的產品，埋佇土內底，平均150工，就會使完成自然分解，減少對環境所造成的破壞。
跨境電商平台董事長 徐惇穎：「2050零碳的目標嘛是國際上的目標，竹仔是100%循環經濟的材料，竹仔三冬就會使收成，收完閣連鞭生出新的。遮的材料，佇應用頂懸落實成做真正的產業，來做成產品。這是阮這改新的產業聚落的目的。」
現場閣展出用竹仔製造的環保椅仔，毋但輕閣好收，嘛方便紮出門。工研院表示，透過這改合作計畫，希望台灣竹仔的環保製程產品更加進步。
2022杭州亞運 台灣百金之路
