嗙雙語政策孤注重英文 學者籲政府保本土語言

台灣語文學會理事長 李壬癸院士:「台灣南島語言的區域性上懸,語言的差別上大,語言差別愈大,表示講這寡語言的人,蹛佇遮的時間上久」。

強調台灣被國際認定南島語言的起源地,佇地理、文化和語言,有絕對的多元性和歷史價值,台灣南島語言研究之父李壬癸教授也煩惱2030年政府欲捒雙語國家,乘載文化和歷史的語言會流失了閣較緊。

台灣語文學會理事長 李壬癸院士:「這是咱真重要的文化財,若消失掉,咱台灣已經是無啥物特色矣」。

除了南島語言,被聯合國教科文組織訂做瀕危語言第三級的台語,也仝款面臨斷層危機。臺灣語文學會和語言傳播相關學者,希望國家收回雙語國家政策,改以多語台灣、英語友善為目標。

臺灣文化政策研究學會常務理事 王俐容教授:「其實國發會的主事者,伊對語言政策是無啥了解的,2020/05/20以後咱的文化部長換人矣,2020/05/28 蘇院長就共這个物件,退轉去文化部,文化部從此以後就假咧無這件代誌,所以咱這馬,並無國家語言研究發展中心這層代誌,咱顛倒有一个足奇怪的中心叫雙語國家政策研究中心」。


台灣語文學會副會長 陳淑娟教授:「愛成立一个跨部會的一个單位,來統籌來規劃咱規个台灣國家語言的政策,經費嘛愛做一个整體的分配」。

過去台灣語言政策的錯誤,致使語言斷根,民間團體希望政府這改緊回頭莫閣糊塗干焦注重英語,顛倒予母語路愈行愈倒退,同時要求政府緊共雙語國家發展中心設置條例草案退轉去行政院,共國家語言發展中心的設置草案列入研擬。



 

全台敬老金大調查

相關新聞