日本發生大地動 嘉義縣特搜隊待命.隨時支援

日本福島宮城附近,3/16暗時發生規模7.3的地動。內政部消防署的國際救援規劃,三月是到嘉義縣;3/17早起,嘉義縣特搜隊已經款好裝備,等待命令,隨時通去支援日本。

特搜隊報告日本地動的情況,閣有任務的內容。3/17早時,嘉義縣消防局特搜隊23名隊員完成人員佮器材的準備,等待中央指派出發協助日本救災。

嘉義縣消防局特搜隊長 王景賓:「平常時就已經有準備好矣。這馬共遮的裝備做伙提出來,閣做一擺操作佮裝備檢查,目前檢查攏無問題。」

嘉義縣特搜隊這幾年攏有參與著台南、花蓮地動的救災行動,有豐富搜救經驗,配合這個月輪值國際救援縣市,縣長翁章梁早時嘛到現場視察,了解準備的情況。

嘉義縣長 翁章梁:「台灣佇這改的疫情內底,日本嘛送咱誠濟AZ疫苗,包括過去311的日本地動,台灣嘛有幫助日本,予兩國之間情誼更加堅定。所以咱等待命令隨時準備出發。」

向縣長說明準備好的器材,特搜隊表示,隊員攏有受過國際救援佮地動災害的搜救訓練,23人分做指揮、搜索、救援、後勤佮醫療五組,隨時等待命令,去日本進行人道救援。

相關新聞

專題|全台敬老金大調查