佇新竹市南大路頂頭的警察宿舍已經囥咧閒，閒真久，後來投入4千500外萬的經費，目前已經修復完工。變做藝文展覽館-「下竹町」，最近會對外開放。而且頭一個展覽就是古蹟學者兼建築畫家-李乾朗，30外幅用手畫的建築圖，有真濟是新竹在地的建築物，來去看覓，你臆有幾幅。
傳統的木造結構佮烏色的厝瓦，倚近閣鼻會著hi-nóo-khih的芳味，這棟起佇1929至1935年的日式建築，過去是警察宿舍，經過重新修復，閣再重現佇逐家面頭前。
時藝文創董事長 黃文德：「(未來)主要是做展覽，第一檔是李乾朗老師的展覽，紲落來阮閣會陸續策展，規劃無仝主題的展覽，除了展覽以外閣有手作課程，以及藝文的講座」。
為著欲予民眾對老建築有興趣，主辦單位揣來出名的建築學者李乾朗，展出伊的手畫作品，包括東門城、新竹州廳、新竹車站等等。
建築畫家 李乾朗：「廟寺是古蹟，古厝嘛是古蹟，日式宿舍嘛是古蹟，每一个古蹟活化再利用，類型應該愛有無仝，因為日式宿舍較光，這佮三合院四合院彼款古厝閣無仝款，因為光度的關係，所以感覺應該展出建築圖，會予人較清楚的感覺」。
這搭徛近新竹火車站，過去日本時代傳說因為火車引入塗炭，所以予人號做烏金町，這改經過修復，市府特別號名「下竹町」，希望加深民眾的印象。