一級保育類猴面鷹著傷摔落田 治療後狀況好

猴面鷹是一級保育類動物,全臺灣賰無5百隻。頂個月有人佇高雄的田內底發現一隻受傷的猴面鷹,趕緊共伊送去屏東科技大學野生動物收容中心,這馬已經沓沓仔復原,後禮拜就會當訓練伊飛。

猴面鷹看起來蘋果面誠古錐,毋過這隻猴面鷹是受傷才送來屏科大野生動物收容中心,因為伊是正爿的翼股骨折,驚伊佇治療過程烏白動,工作人員愛共伊麻醉,翕相了後,仝時間抽血、做雷射治療,希望伊趕緊好起來。

屏科大保育類野生動物收容中心獸醫師段雲傑:「經過麻醉檢查,發現伊是正爿翼股尺骨(口誤)遠爿,有一搭閉鎖性骨折;經過一個月復健治療佮固定,骨折的所在收束嘛較穩定。」

這隻猴面鷹其實是頂個月佇高雄一个田地予人發現,才送來遮治療,佳哉經過一個月,復原情形誠好。

屏科大保育類野生動物收容中心獸醫師段雲傑:「經過一个月固定修復時間,骨折處骨頭收束的產生,閣再一兩禮拜拆除包紥,會當去訓練飛行。」

猴面鷹嘛是一種貓頭鳥,毋過目前佇台灣數量誠少,估計才三四百隻,收容中心嘛罕得治療受傷的猴面鷹,這擺伊誠好運予民間救援,健康了後就會當放散。

相關新聞

專題|全台敬老金大調查