ﰅ山若無細膩會引火燒山 救災.重建了時了工

最近幾冬,國內民眾誠愛 peh 山。佇舊年,就有民眾 peh 山煞造成玉山火燒山,燒12工才共火拍化。投入救災、重建是了錢閣了工,林務局就提醒民眾,去山頂行踏、點火用火攏愛特別注意。

一步一步行佇山頂,美麗的景色予人心情放鬆,最近台灣peh山人口那來那濟,煞也增加山林的風險,2021年五月,因為人類燃火造成玉山火災,救災人員佇超過三千公尺懸的懸山拍火,也著兼顧自身的安全。

嘉義林管處阿里山工作站主任賴龍輝:「山跤佮山頂溫度差真濟,閣有日時佮暗時的溫度也差真濟,懸山頂空氣較薄、喘氣較困難,大火火煙也嘛會影響喘氣。對個人體力造成負擔,遮攏會影響著救火效率。」

玉山大火造成的林木生態損失、救災人事的成本加起來大約兩億,災後的重建也誠久長,尤其2021年參2020相比,森林火災就對53件增加到93件。

林務局林政管理組技士蔡博雅:「阮這十年來的統計,發見九成以上攏是人類活動引起的,大概只有3%是霆雷公引起的大火。台灣北部因為天氣影響,長年攏是較溼的天氣,主要是中南部地區逐年的十月到隔轉年四月攏較焦,所以真容易發生森林火災。」

年過就是春暖花開的時節,林務局提醒民眾,peh山進前一定愛做好自我評估,生份的山區上好揣專業導覽員,做一个尊重山林的peh山人。

全台敬老金大調查

相關新聞