拚春節防疫 高雄26商圈禁試食.熱顯影磅體溫

舊曆年欲到矣,高雄市的三鳳中街已經有誠濟人出來款過年愛用的物件。高雄今年有26个商圈,對拜六開始相連紲攏有活動,毋過這馬疫情有淡薄仔緊張,民眾除了一定愛掛喙罨,也袂當試食,三鳳中街商圈嘛拍算欲出動熱影顯示,共民眾磅體溫。

閣有三禮拜就欲過舊曆年,高雄三鳳中街有過年氣氛,嘛已經有人提早出來款年貨,捾甲一大包。

民眾:「想講人較少,猶是有淡薄仔煩惱疫情,所以喙罨愛掛好」。

店家:「這馬逐家攏愛提早買,講莫佮人積做伙,攏會提早買」。

為著欲刺激消費,包括三鳳中街在內26个商圈,對這禮拜六開始,就有高雄過好年活動,毋過看著疫情有淡薄仔緊張,已經有確診者來到高雄,店頭家嘛真煩惱,因為袂當試食,加減就會影響著生理,另外商圈嘛拍算加強防疫措施。

三鳳中街商圈促進會理事長 伍進昌:「一定愛掛喙罨,袂使試食,阮嘛欲來裝熱像儀,我嘛會分酒精予店頭,只要人客來買物件,阮攏予伊噴酒精較安全」。

新堀江商店街永續發展協會理事長 楊翔茗:「阮這馬人潮恢復大概有一半,看覓這个過年」。

經發局表示,舊年因為五倍券佮高雄夜市券,逐个商圈收入攏有增加三成左右,今年拄著台灣燈會佇高雄,這个過年,26个商圈準備真濟活動,希望繼續帶動消費佮買氣。

 

相關新聞

專題|全台敬老金大調查