2021臺灣設計展佇嘉義 學生做桌仔耍認捌在地

明仔載嘉義設計展就欲正式開幕,嘉義市政府為著替學生加開發佮設計展相關的教學活動,特別委託市內的國中、國小做伙設計走讀地圖、桌仔耍等等,希望透過遮个物件,予學生參與學設計的概念,嘛增加在地認同。

趕佇咧台灣設計展開幕進前,國中生佮大學老師共同推出運用在地人文,閣配合嘉義知名景點所設計的桌仔耍,希望囡仔那耍那了解在地的故事。

嘉義市民生國中 郭同學:「我感覺伊是趣味閣好耍,但是有淡薄仔困難度」。

 

團隊指導老師 陳秀萍:「透過這套桌仔耍,希望逐家提著這个物件的時陣,會當透過佮厝內人耍的過程佮互動,更加了解嘉義市」。

這套桌仔耍內底,有50搭景點、4條古早步道的資料,有誠完整的歷史紀錄,而且所有的圖面攏是學生畫出來的。遮的學生講,因為這改的機會,才知影一寡對嘉義閣無了解的所在。

嘉義市民生國中 江同學:「因為真正就無熟,雖然攏會經過,但是我完全毋知遐叫啥物名,無就是講根本毋知影嘉義有彼个景點,畫煞就是真正會閣較了解嘉義」。

 

嘉義市民生國中 黃同學:「家己畫遮久的作品,然後會當印做桌仔耍,誠有成就感,以前嘛有這款的經驗,定定攏是家己畫畫咧,嘛無人看會著」。

除了桌仔耍的設計,嘉義市教育處嘛配合這改的台灣設計展,推出予囡仔走讀的地圖,佮結合旅遊的教學雙語APP,希望透過設計展增加囡仔的生活佮在地智識。



 

相關新聞