嘉義舊監獄變展場 牢房改造做藝術人文空間

有99年歷史的嘉義舊監所,目前是國家古蹟,佇這改的臺灣設計展嘛是主要的展覽場館之一。為著欲拍破逐家對監所冷吱吱的感覺,設計團隊利用一間間的牢房,結合在地人文,打造藝術佮創意的空間;而且閣開放一寡牢房予民眾會當來翕相,體驗佮過去無仝的臺灣設計展。

櫃檯人員親切的問好,但是遮不是旅店,遮是嘉義的舊監獄,為欲配合嘉義市台灣設計展的舉辦,透過設計團隊的妝娗,予這座監獄有了新的感覺。

參觀民眾蔡小姐:「每一个創作藝術品,攏會真直接感受著講,這是嘉義人做出來的物件,是誠有溫度的。」

參觀民眾林先生:「展覽有加一寡妝娗、有一寡色彩,所以囡仔來看顛倒袂感覺會驚,閣誠歡喜。」

一間一間的牢房,有藝術家的創造空間,嘛有在地人文的紹介,甚至閣共病舍改做是會當啉飲料的所在,改變過去監獄烏烏暗暗的感覺。

現場服務人員:「這爿替你調的飲料叫做家有老木,伊是用燕麥奶做基底,內底閣有加一寡檜木的芳料。」

參觀民眾羅小姐:「感覺講這內底保留共袂䆀,而且閣感覺誠有創意,袂予人感覺誠死板、誠可怕。」

嘉義舊監獄策展團隊葉哲岳:「透過色彩、透過軟性的材質、透過共同創意的雙手,去拍破逐家對監獄固的想法。」

佇1922年啟用嘉義舊監獄,到今已經欲一百年,這改配合台灣設計展的舉辦,成做展覽的主場之一。設計團隊表示,這毋但是台灣設計展當中上有特色的展覽館,嘛予監獄所代表的符號,有了新的解說。

全台敬老金大調查

相關新聞