臺灣現代民族音樂之父 郭芝苑紀念音樂會開辦

國寶級作曲家-郭芝苑,一生攏為臺灣民族音樂拍拚,創作內底有西方管弦樂、歌劇,嘛有流行歌曲佮囡仔歌,今年是伊百年的生日忌,佇高雄有一場郭芝苑文物展覽佮紀念音樂會,欲向這位國寶級大師表達敬意。

鋼琴家葉綠娜,現場彈奏的就是郭芝苑上出名的小協奏曲,雖罔是西方的音樂型式,仝款會當予人感受著台灣這塊土地,這就是郭芝苑迷人的成就。

衛武營國家藝術文化中心藝術總監,簡文彬表示:「伊真成功共西方重要管弦樂劇的精神,佮台灣充滿鄉土印象的旋律,融合做伙,會當予愈濟人佮意、欣賞交響音樂。」

郭芝苑是台灣第一位發表管弦樂佮歌劇的作曲家,伊嘛創作台語電影配樂、流行歌佮囡仔歌,作品非常多元,攏充滿台灣味,伊佇2013年過身,其實伊高中時捌學過小提琴,因為手指頭仔彎曲的關係,學了無順利,才開始音樂創作。

衛武營節目專員,賀淑媛表示:「伊知影家己無法度成做一个傑出的小提琴家以後,伊就轉去開始作曲。」

今年是郭芝苑百年的生日忌,透過伊的樂器、樂譜、手稿等等文物展覽,後個月嘛有紀念音樂會,通予逐家做伙了解這位國寶音樂家的故事,感受伊愛台灣的心。

全台敬老金大調查

相關新聞