爸仔囝半暝釣魚 囡仔煞跋落水.佳哉2人平安

高雄蚵仔寮漁港昨昏暗時發生爸仔囝攏跋落水的意外。一个老爸𤆬1歲的查某囝,暗時仔去港邊釣魚仔,查某囝煞熊熊摔落去海裡,老爸隨跳落海欲救𪜶查某囝。佳哉海巡人員有聽著𪜶咧喝咻的聲,緊猛共𪜶救起來。暗時仔毋睏共查某囡仔𤆬去海墘仔,閣發生危險,已經涉嫌違反兒少法,目前社會局當咧介入調查。

一个一歲的查某囡仔予人救起來岸邊,經過海巡人員佇岸邊共做CPR才知人,查某囡仔精神隨大聲吼。

18暗9點外,高雄蚵仔寮漁港發生兩个人跋落水的意外,海巡人員聽到港區傳來有人咧喝咻的聲,緊猛去救人。

海巡南部分署蚵子寮安檢所長張書凱表示:「發現跋落水的是一个成年男性,佮一个查某囡仔,現場隨分兩組開始救援行動,因為查某囡仔喘氣佮心跳攏真弱,經過本所人員救起來岸邊了後做CPR。」

海巡共已經無力的男性搝起來救生艇,𤆬轉來岸邊,送病院了後2人已平安無代誌,查某囡仔目前猶佇病院觀察當中。經過了解,這2个人是親子關係,老爸𤆬查某囝對大寮去漁港釣魚仔,原本叫是查某囝佇伊視線範圍內,想袂到目一𥍉煞跋落海。

高市警岡山分局赤崁派出所長李威昌表示:「經過了解是姓張民眾佮𪜶查某囝,做伙去埠岸邊釣魚仔,結果查某囡仔無細膩跋落海,𪜶老爸隨跳落去欲救人,想袂到體力無夠煞駐水。」

蚵仔寮漁港是高雄真有名的觀光漁港,隨時有人佇港區咧釣魚仔,因為岸邊無防護設施,小可無張持就可能發生危險。警方認為這个老爸傷過大意,涉嫌違反兒少法,已通報社會局。社會局19也派社工訪視、欲來理清囡仔跋落海的原因,若確認父親照顧有疏失,會協助輔導、提升家庭照顧的功能。


 

全台敬老金大調查

相關新聞