臺鐵"藍皮解憂號"拜六復駛 逐日1幫遊覽南迴
發布時間：
更新時間：
臺鐵的藍皮火車，舊年底因為鐵路電氣化通車了後就無閣駛，經過這十個月的整修，藍皮火車今仔日閣重新出現矣，車廂內底的電風、青色椅仔攏全部保留，去南迴鐵路有通坐著，觀眾朋友作伙來看。
搭載真濟人回憶的台鐵藍皮火車，又閣出現佇枋寮車頭矣，除了車廂外觀重新噴漆，改轉來上頭仔的藍色，車廂內底，台鐵保留藍皮火車的特色，會當拍開的窗仔、車頂的電風，猶閣有青色的座椅佮吊環，真濟設備因為已經揣無零件，有的愛靠手工打造。
導覽員：「對骨架開始，這攏是重新貼皮，重新做矣。」。
臺鐵局長杜微表示，藍皮解憂號，十三台車廂攏總分五種，座椅型式就有三種，真濟細節經過覽導員，你會感覺真趣味。
藍皮火車是目前台鐵主線上老，算阿公級的火車，經過旅行社包裝，除了有專人解說，拍開窗仔就會當欣賞海景佮山景，閣安排佇南迴線一寡小站暫停參觀，專家嘛建議未來藍皮火車的路線會當閣較濟。
鐵道專業蘇昭旭表示，行完南迴紲落來會當行花東，花東行入台灣花東緃谷的田園交響曲，甚至嘛會當考慮未來舊山線。
這馬藍皮火車號做解憂號觀光列車，10/18重新開車，逐工一个車幫對枋寮到台東往回，業者表示，目前已經有三千外人訂票，搶欲來坐這幫古早味的火車去旅行。
