嘉義市政府配合民間團體，佇市內的崇仁醫專，設嘉義市頭一个社區照顧關懷據點，提供序大場所佮設備，學校長照科系的學生，嘛有會當有實際陪伴序大的實習機會
配合老師的指導，上課的學員做伙伸展身軀做瑜珈。遮的學員攏是60歲以上的序大，而且𪜶上課的動作，攏有請物理治療師來設計，欲來加強𪜶的筋肉。
崇仁醫專老人服務事業管理科主任，楊筱慧表示：「透過𪜶肢耐力，提升了後，我會當共逐家講，𪜶的心情就會變好，而且𪜶會當做的代誌變濟，較袂有過去彼種，我老矣啥物代誌攏無法度做的感覺，顛倒會變了較有活力。」
上課序大，林女士表示：「會當增加阮的筋肉，肌肉的力頭。」
這間佇學校內底新成立的長照據點，這個月22才正式啟用，來遮的序大毋但有學校資源的課程通學習，長照相關科系的學生，嘛會當培養服務的經驗。
據點人員，傅小姐表示：「對阮少年人來講，嘛是跳脫一寡舊的印象，其實少年人搝倚佮序大的距離，阮對這个行業嘛較袂講傷過排斥，我感覺是未來的趨勢，青銀共造的部份。」
上課序大，宋女士表示：「你若佇厝內跋倒，猶是辛苦病疼攏無人知影，來到遮，遐濟人咧照顧，然後食飯嘛食甲足營養，這真正是老人的福音。」
雖然才啟用無幾工，但是逐工攏有序大欲來上課。主任表示，紲落來會規畫高齡瑜珈的推廣佮認證，希望培養閣較濟的老師，希望別位據點的序大，嘛會當來上仝款的課程。