德國囡仔古"格林童話" 今也有臺文版本出刊

有聲冊內容：「我紅帽仔啦，我紮雞卵糕佮酒來，緊開門。」

逐家真熟似的外國囡仔古「格林童話」，這馬也有台文的版本，親像紅帽仔閣有阿妹仔，你敢臆會出來，是佗一个故事？

有聲冊內容：「阿妹仔，阿妹仔，共你的頭鬃放落來遮。」

主編陳麗君表示：「這个查某囡仔，為啥物會關佇遐，因為媽媽去偷食隔壁，這个妖婆種的 mé-á-tshài，所以阮才會共伊翻做阿妹仔，伊這个名就會使結合講mé-á-tshài 阿妹仔。」

作者陳麗君佮伊的團隊盡量共原味的德國民間文學翻譯過來，連內底的字詞，按怎結合臺語的語感攏真講究，像故事–「塗炭仔」內底，就有一个鬥句，用臺語念起來是真趣味。

作家鄭順聰：「伊講樹仔、樹仔搖振動，金衫銀鞋鬥相共，共阮裝予水噹噹。就變矣， puah。」

有聲冊內容：「才拄念煞，鳥仔就對樹仔頂，落一領用金鍊銀珠，紩甲媠噹噹的衫。」
 

作家鄭順聰表示：「這个翻譯過程毋但是講故事，咱嘛是欲共一寡仔咱臺語原本無的
共翻譯過來，成做咱慣勢佮普遍咧用的。」

主編陳麗君表示：「臺語文伊是有文字書寫的語言，其實會當真準確來表達各種的思想文學。」

這本《你無聽過的格林童話》，德語、台語攏有，呈現出原文內底，故事的烏暗面佮彼个時代的社會背景，佮咱細漢讀過的版本可能無啥仝款，毋過翻譯者希望透過這來表達教育性，規本冊攏總有五篇故事，請國校仔的學生來唸，嘛希望成做這个年紀的囡仔𪜶的一个讀本，予青少年嘛會當透過臺文，增加世界觀。