小店面驚趁無5倍券 民團:該限定佗產業才准用

振興五被券規畫發放,小店面擔心「看有食無」。

振興五倍劵猶未施行,毋過真濟小店仔煩惱講,民眾攏去大型賣場消費,根本無著五倍券的庇蔭。今仔日就有民間團體佮立委做陣呼籲政府,愛共五倍劵限制用佇受影響的行業。

已經開放室內食食,但素食餐廳店內,猶是無人坐落來,恢復生理毋知閣愛等偌久,雖然行政院準備欲發振興劵,毋過對一寡細間店面來講,其實有淡薄仔疑問。

素食店業者:「舊年的氣氛佮這馬完全無仝,所以講若振興劵用的時間無搝長,效果會無法度顯現出來。」

早餐店業者:「敢欲找零星的這个問題,是毋是也真麻煩。」

有人也煩惱,若照舊年按呢發放,其實有真濟消費者攏走去大型的企業,細間店面顛倒食無,所以基層也有意見,認為這改若發振興劵五倍劵,政府應該愛照過去各部會的紓困經驗建立名單,也有民間團體表示,愛限制干焦通用佇受創行業才著。
 

台灣中小企業聯合輔導基金會董事長賴坤成表示:「振興劵是希望講會當做比較較誘發型的消費,像這个餐飲、旅遊、運輸,閣有一寡小間的店面。」

也因為頂改發的票劵上細張是兩百箍,立委呼籲政府這改應該規劃一百箍的部份,特別針對細間店面,也予票劵發揮上大的用途。與會的幾若个部會代表是表示,會將意見傳達予行政院。

相關新聞

專題|全台敬老金大調查