"頑皮世界"捌涉虐待動物 今欲閣進口麒麟鹿引爭議

南部的私立動物園「頑皮世界」，前一站仔才煏出飼麒麟鹿的環境無好，10年就死4隻，這馬講年底閣欲進口18隻入來。動保團體這回是出面講絕對愛阻擋。

前一站仔傳出頑皮世界的麒麟鹿皮皮予人摧死，加上園區十冬內發生4隻麒麟鹿過身，予外界質疑養飼環境有欠缺。這陣園區拍算年底對史瓦帝尼進18隻倚絕種的網紋麒麟鹿，動保團體表示貿易對象和皇室關係誠好，掌握狩獵法、和CITES瀕臨絕種野生動植物國際貿易公約的管理權力，根本球員兼裁判。

台灣動物社會研究會副執行長陳玉敏講，「就算你是非會員國的交易，你猶是愛請對方提出無危害佮合法來源證明。」

第18屆CITES會員國大會首席長頸鹿專家代表Fred Bercovitch講，「我希望政府佇進行這筆交易進前，愛去審查確認所有lin2收著的相關文件和信息。」

動保團體表示頑皮世界欲進的是肯亞、索馬利亞和衣索比亞的原生種網紋麒麟鹿，不過遮的國家這幾年攏無輸出去史瓦帝尼的紀錄，若無相關文件佐證，恐驚會牽涉非法交易。

林務局野生物保育科科長翁嘉駿表示，「頑皮世界這改進口動物，送審查的文件攏有合規定，林務局照史瓦帝尼 CITES管理機關所提供的文件 ，引進的動物攏是農場家己拍種的，所以評估這个個案袂衝擊麒麟鹿野生族群，也袂影響台灣的生長環境，所以阮佇簽審平台同意伊輸入的申請。」

林務局表示頑皮世界送審文件攏合規定，也承諾一禮拜後針對動保團體的質疑，做出具體說明。