這馬因為疫情湠袂煞，全台灣的夜市仔真濟攏暫時關起來。夜市產業總工會、呼籲中央政府，著愛放冗紓困和貸款的申請資格，也愛針對夜市管委會所管理的部分，先匯救助金到擔頭的口座。
一擔一擔的格仔位，攏包包起來，一工收入超過百萬的高雄瑞豐夜市仔，傳出七月底可能會永遠停睏，疫情損斷夜市經濟，排擔的業者表示毋但食材損失了算家己的、店租猶是愛照納，批評政府的紓困4.0申請限制濟、發的速度根本發袂赴養。
台灣夜市商圈產業總工會理事長林定國:「電話攏敲袂入去，網路攏登袂起去，你講閣欲速速領著這寡補助款，可能等你電話敲通就已經餓死矣。」
高雄凱旋觀光夜市主委劉坤松:「攤商名冊阮有提報予市府佮中央，你是按怎無欲用攤商名冊來做補助。」
民眾黨立委邱臣遠:「阮會要求經濟部，透過聯福基金會做相關的輔導，上重要的是身份的認定份，我想舊年已經有經驗，是毋是提承諾書或者是同意書，就會當放闊認定。」