5/31前降雨量若無夠 新竹恐驚"送水5工停2工"

這站仔毋但疫情嚴重,全臺灣水情仝款食力,洘旱中央災害應變中心5/19宣佈,新竹地區若是月底進前,水庫的集水區,平均降雨量無到100毫米,自6月開始,愛施行"送水5工、停2工"的限水措施。會影響超過33萬戶,而且新竹科學園區的省水率嘛對15%調整到17%。

民眾聽著有可能後個月新竹地區欲開始限水,趕緊來買水桶準備轉去儉水。賣場這兩工水桶賣了不止仔好。水情食力,民眾煩惱,恐驚真濟行業攏會受著影響。
 
民眾:「會去影響真濟方面,像農作、洗身軀,會去影響著真濟民生需求的部分,會有真濟無利便的所在。」
民眾:「應該真濟行業攏會去受著影響。」

自來水公司19的統計資料,新竹寶山佮寶二水庫水量賰163萬噸,若是閣無落雨,新竹縣市會開始分做兩區開始限水,縣市政府嘛已經做好整備。
 
新竹市長林智堅:「新竹市會有135个供水站,這馬攏已經陸陸續續施工當中,這兩禮拜以內,全部共這135个供水站完成。」
新竹縣長楊文科:「工務處已經做好準備,就是分區限水以及按怎供應,予民眾捾水的地點,阮攏已經做好準備矣。」

來到新竹科學園區,雖然講有專管使用的園區袂停水,猶毋過儉水率需要對15%提升到17%,雖然會比進前減5千噸的水,毋過廠商表示會使用水車載水,產能袂去受著影響。

全台敬老金大調查

相關新聞