原住民保族名文化傳承 訴求證件莫強制加漢字
發布時間：
更新時間：
一陣關注族名的原住民青年，5/12去內政部交訴願書，要求戶政系統，愛予身分證頂頭，會當干焦寫族語拼音就好，袂使強制一定愛漢字。In表示，原住民族的號名，其實有文化傳承，強制用漢字，是一種主流文化的壓迫。
原住民Bawtu Payen:「 我的身分證漢字遮爾大，我的族語名遐爾細，攏看袂著，這才是我真正的名。」
提出進前去到戶政事務所的申請書，希望身份證上干焦只有羅馬拼音的族名，除了這位泰雅族的寶杜巴燕，閣有其他原住民青年，訴求身份證頂懸應該愛直接用羅馬拼音，才是in本底的族名。
In表示族名有原本的意義，毋是漢字直接翻就會使，過去申請收到機關的回函是愛作業的便利性，但in的權利咧？所以in要求政府愛開放族名單獨列佇身份證，尊重原住民族語言文字、理解原住民文化，這擺也特別將訴願書送予內政部，現場由戶政司的代表收下，表示會閣交予頂懸反應訴求。
原住民Ciwang teyra:「阮太魯閣族號名，是囡仔名佮家長名連結做伙，名有真重要的意義，阮對外面自我介紹的時陣，阮真少去講漢名這層代誌，因為漢名佮我的關聯性無蓋大，漢姓佮我的關聯性也無蓋大。」
