屏東失智症生活體驗空間 ﰓ民眾體會患者感受

台灣65歲以上的老大人,每12人就有一个人著失智症,失智的人口愈來愈濟,佇屏東有一个特殊的、失智症生活體驗空間,予民眾裝作、失智症病人,體驗失智老人的感受。

參加體驗的民眾行入門,這馬每一个人攏是吳火木阿公,烏暗暗的路,四箍圍仔的玻璃攏是阿公心內話,我是啥人?這个人為啥物欲對我遮好?紲落來是阿公的日常生活。

策展人周文珍:「試看覓進入失智症伊的生活當中,困擾、認知障礙帶來無方便,伊心內感受。」

阿公的房間,你熟似無?每一个邊角會當聽著伊se̍h-se̍h-liām的聲,明明查某囝交代莫烏白走,阿公猶是出門想欲買物件,這時陣愛掛這種特殊的目鏡佮手橐仔,雙手的三个手指頭仔攏有塑膠片,體會失智老人in的手會較無感覺、目睭嘛看袂清楚。

體驗民眾饒筱曼:「完全看無。」
體驗民眾溫玉蘋:「我目睭花花花,籃仔內底一字攏看無,我足認真看,電火下跤嘛看無。」

掛目鏡手橐仔踅超市,佇限定時間內買好所有的物件,其實毋是一層簡單的代誌,徛佇櫃台前,有人連皮包仔的錢攏提袂出來,規氣用倒的,吳火木阿公的生活,實在無輕鬆,體驗的民眾攏感覺緊張、煩惱閣有無奈。

策展人周文珍:「對失智症宣導,較捷看著真濟智識和理論,知影症狀、行為、困擾,較罕得真正換穿伊的鞋,經歷伊生活的一部份。」

體驗民眾饒筱曼:「會當用上簡單的方式先去同理,先去了解序大人佇厝內,抑是有失智症的時陣,伊的感受是啥物。」

體驗民眾溫玉蘋:「這个體驗予我感覺,像个社會足需要咱鬥相共,特別是序大人這沿。」

屏東基督教病院打造這个空間,民眾體驗失智阿公的生活,嘛透過分享佮討論,共情緒轉換做正面改變的力量,不管是民眾,抑是照顧失智患者的人,加一寡同理心,就會當予序大人閣較好的照顧佮陪伴。

相關新聞

專題|全台敬老金大調查