俄國舞者來臺20冬 教身心障礙囡仔跳水上芭蕾

有一位來自露西亞的水上芭蕾舞者Julia，佇台灣20外冬，教過上百位身心障礙的囡仔練水上芭蕾，原本舊年欲用台灣的名義，去東京藝術游泳節表演，煞因為疫情取消，毋過in這陣猶是繼續練舞，因為相信戲棚跤是徛久的人的。

Julia老師佇岸邊，tshuā 遮的有唐氏症、注意力較不足、身心障礙的囡仔，先練水中芭蕾舞的基本工夫，一般的囡仔嘛鬥陣練。

遮的囡仔有對加拿大、法國、美國、英國和露西亞來的，in無分你我，鬥陣合作，家長也誠歡喜看著in的成長。

原本這陣身心障礙囡仔欲佇舊年東京藝術游泳節，以「台灣」的名義參與國際競賽，因為疫情無法度出去，不過Julia老師猶是固定逐禮拜，義務tshuā in練舞。

對露西亞來，今年45歲的Julia，佇台灣生活20外冬，是中華民國水上芭蕾舞協會的創辦人，陪上百位特殊需求的學生練舞，伊講水中芭蕾的美感就是團結合作。

這幾冬Julia也佇台灣辦身心障礙水上芭蕾舞國際公開賽，邀請各國選手交流，未來Julia也會繼續推捒予水上芭蕾列做帕拉林匹克運動會的競賽項目，望予遮的行比別人較慢的囡仔，會當用優雅和佇水中的自信，和世界交朋友，行出閣較空闊的路。