普通狨走私入境赦死罪 臺北動物園公開唌人目

這站仔，民眾若去到臺北市立動物園，有通看著新朋友「普通狨」，看起來古錐、古錐，予人想欲共伊惜惜。毋過，「普通狨」本底是巴西的物種，因為走私入來到臺灣，去予海關查著，普通狨是保育類，才無共伊刣殺，通過檢疫了後，交動物園照顧。

佇樹仔頂爬來爬去的這兩隻，耳空邊仔有兩撮白色的毛，IN叫做普通狨，細細隻，身軀長平均才十幾公分、尾溜閣比身軀長，是台北動物園，新展出來參民眾見面的動物。

本底是南美洲的生物，兩冬前走私入境，佇桃園機場予海關查著，通報防檢局，發現是保育類動物，才就近交予動物園保育員照顧，原本干焦手板仔大細，出世才10工的６隻幼囡仔才通健康生甲這陣遮大漢。

其實外來物種走私，誠濟是流入寵物市場，財政部關務署也講，因為查著的普通狨是保育類動物，才有通送去動物園收容（siu-iông）存活落來，一般若外來種走私入來，若是予人掠著，攏會以人道撲殺phok-sat來處理。