臺北共享汽機車當時行 停車位僫揣今成問題

講著租機車的服務，這馬也有一種誠利便的方式，就是共享機車。目前臺北市內有三个業者咧做，攏總有上萬台的共享機車予消費者使用。毋過這馬也出現，機車的停車格仔無夠停的情形。

手機仔提起來，就會使來租用機車，這是這馬真方便的共享機車服務，民眾若是有使用機車的需求，揣著遮的停佇路邊的共享o͘-tó͘-bái，就會使隨租隨還。

這馬台北市總共有3个業者提供這款的服務，根據台北市政府交通局的統計，總共有12956輛的共享機車提供民眾使用，但是台北市騎機車的人口本底就濟，遮的共享機車敢會佮in相搶停車位？

毋閣記者實際訪問業者，是只有一間業者有佇咧共傷集中的車運去其他所在囥，另外兩間業者是無講著有按呢處理。而且嘛有民眾感覺，共享機車是干焦吸引無車的人，有車的人是無啥會使用。

政府捒共享機車，希望會當漸漸取代私人運具，毋閣有民眾講，經濟狀況也是無法度放棄私人o͘-tó͘-bái的原因，政府欲捒共享的生活方式，目前恐驚猶是無遐爾仔簡單。