新竹市"三角公園"今修復 古早味活動唌民眾

在地人號做三角公園的新竹市建國公園，往過定定有老人佇遮行棋開講，毋過因為欠修整，幾若年煞變做治安的烏暗地。市政府最近共中央討著經費，修整完成瞭後，特別辦一場party，欲共眾人的記持揣倒轉來。

台頂舞者復古打扮，加上現場懷舊的氣氛，若親像時光反流轉去到過去。新竹建國公園因為地點的關係，嘛予人號做三角公園，原底是在地人捷會來的所在，毋過這幾冬，煞較罕得有人來行徙。

這改公園重閣啟用，市府佇特別辦復古派對，除了古董車、好食的古早味、好耍的彈珠台、拍煙腸佮十八豆仔，鬧熱閣趣味。

徛佇新竹市西門街的建國公園，佔地欲倚1500平方公尺，這擺市府投入7百外萬改造修整，希望完工了後成做舊城區罕得有的核心綠帶，市民會當閣較捷來行徙。