戲劇"芎蕉園的祕密" 說美麗島事件.論性別議題

公視台語台明年欲推出全新的戲劇，其中一齣芎蕉園的祕密，今仔日佇高雄鼓山洞開鏡。這齣戲的女主角陳妤毋但共頭鬃鉸予短，而且閣挑戰講臺語、演同志，故事嘛講著美麗島事件，按算明年四月就會播出。

導演周美玲佮四位主要演員，佇鼓山洞頭前舉辦開鏡儀式，祈求拍戲順利。【芎蕉園的祕密】是描寫女主角孟娟揣同學到in厝內的芎蕉園鬥相共，兩人發展出曖昧的情誼，閣做伙捲入白色恐怖的風暴，鼓山洞這个所在捌出現佇故事內底。

演員陳妤是這齣戲的女主角，伊頭擺共頭毛鉸短演出，嘛挑戰講台語佮同志的角色。

演陳妤IN兄哥的孫綻是高雄人，伊講拍片進前，導演有予伊三本冊去了解美麗島事件。

公視台語台準備佇明年推出四齣戲劇，包括愛情、勞權、女性佮環保等等的題材，芎蕉園的祕密開鏡了後，按算明年四月就會當播出。