屏東竹田百年車頭 望整修後.轉型帶動觀光

屏東縣竹田鄉，一間柴起的舊火車頭，已經有百年的歷史。自本是委託民間經營，毋過今鄉公所有拍算欲收轉來家己管理，就是講欲代先過翻，共這片舊驛頭，建設做鐵路文物的展覽場所，也通予愈濟外位的旅客，來見識竹田庄頭的美麗。

看的出來，這座用柴起的舊車頭保存了真好，其實，屏東的竹田驛站已經有百年的歷史，最近準備欲共翻新，予老建築會使和鐵道文化結合，唌人來遮耍，用文化來帶動觀光。

原底竹田驛站是委外經營，這陣鄉公所家己收轉來做，頭先毋但愛改造規个建築，閣愛整修塗跤和壁，而且in閣特別請臺鐵鬥相共，提供一寡和鐵路相關的文物，通展示予逐家看。

除了共舊車頭翻新，鄉公所也拍拚培訓導覽的人才，用心規劃竹田小旅行的體驗遊程，毋干焦是欲吸引遊客來觀光，閣較希望竹田驛站會當呈現出無仝款的型態，重現百年車頭的風華。