花縣府宣佈 撤銷卜蜂飼雞場的許可執照

食品業的大公司卜蜂集團，本底有欲去花蓮投資飼雞仔場，結果煞引起民眾踏出來抗議，卜蜂嘛即時喝擋恬。今早起，花蓮縣徐榛蔚縣長閣出面表示講，正式撤銷進前已經發予卜蜂公司，遐的所有的許可佮執照，抑卜蜂這爿嘛聲明講，對花蓮縣府提出嚴重抗議。

花蓮縣政府批評「卜蜂公司」講，6/5發表「重大的消息」，保證若猶未和在庄的民眾撨好勢，建設「飼雞仔場」的計畫，就袂閣振動。毋過經過這站時間，「卜蜂公司」攏無繼續和民眾溝通，照看是無誠意欲完成共識，也嚴重影響著，花蓮產業的發展。所以縣府決定欲撤銷進前所發予「卜蜂公司」，遐的許可佮執照。抑毋過，「卜蜂公司」聲明講，所有的執照攏是經過合法的過程去申請著的，ﰀ會共縣府提出訴願閣有要求賠償。