屏東歸來慈天宮設計媽祖掛喙罨尪仔 宣導防疫

屏東的慈天宮這幾年推廣真濟的文創商品。今年因為武漢肺炎當咧滾絞，廟方也推出媽祖婆掛喙罨的尪仔，欲提醒鄉親愛作伙防疫。

1身、1身媽祖婆尪仔tshai7佇廟裡，逐身攏笑甲目睭微微，看起來不止仔古錐。毋過斟酌共看，遮的媽祖婆尪仔面頂哪會攏掛1塊喙罨？

原來這是屏東歸來慈天宮的用心，現時武漢肺炎滾絞，廟方專工設計面掛喙罨的媽祖婆尪仔，逐身尪仔攏閣帶1罐細罐酒精，就是欲提醒民眾著共防護做好勢。


受武漢肺炎影響，媽祖遶境的活動毋是延期就是取消。屏東歸來慈天宮嘛取消祝壽的活動，改推捒掛喙罨的媽祖婆尪仔，呼籲民眾防疫事工猶袂使放冗，嘛望宗教文化更加倚近咱的生活。