竹北東海三街徛家著火 厝主翁某兩人死亡

新竹縣竹北市，東海三街一搭透天厝，昨暗半暝火燒，消防局有派出人員佮消防車去搶救，毋過猶是有一對中年的翁仔某不幸來燒死。初步判斷著火的源頭，是疊佇咧一樓的一寡紙批、廢品，總是，詳細發生的過程，著閣調查予確實。

昨暗半暝12點外，竹北這棟透天厝雄雄來著火，消防人員趕到位就趕緊濺水搶救，經過3點鐘久，火勢才控制落來。／不幸燒死這對翁仔某，翁婿今年68，牽手今年59，兩个攏有殘障的手冊，平常時仔是抾一寡回收品咧渡生活。／因為厝內的古物、紙批佮廢品鎮甲規下，嘛致使火愈燒愈猛。／早起鑑識人員已經入去收集證據，欲查明著火確實的原因。

張君豪 新竹報導