已經飛28冬 遠航頭1隻MD83型客機退役

民航局舊年修正「民用航空運輸業管理規則」，通過講按明年正月開始，已經紡超過26冬，載人客的飛行機著愛強制淘汰。／遠東航空今仔日就宣佈講，公司內面上蓋濟歲的飛機B28007正式退休，這隻嘛是遠東航空頭一隻MD83型，載人客的飛行機。



遠東航空特別為這架真老的飛機，舉行送別的典禮，嘛宣布佇咧年底進前，in閣有三隻超過26冬，載人客的老飛機欲退休。／遠東航空嘛講，因為這四隻飛行機性能攏猶誠好，現時已經有買主真有意向欲承。／In也表示講，換新飛機，第一困難的就是人員的訓練，未來會盡量一月日就引進一隻新飛機，予機隊保持少年的品質。／目前咱國的航空公司，中華航空飛行機的年份，平均扯是九冬外，長榮上年輕，平均扯才5年統，遠東航空飛行機的年份平均扯是十五年外，抑現時閣有八架是超過20年。／這馬的規定，飛行機超過14年就愛由民航局派人，固定進行特殊的檢查。