民團:戰時物資若按戶發放 恐驚會有民眾提無

為著欲提升全民的防衛意識，政府有印「台灣全民安全指引」，欲普發到全國980外萬戶家庭，也有規畫防空避難所，佮漢光演習模擬城鎮作戰。最近有民團收集30外个團體的意見、 發佈政策建議書，指出政府目前防衛韌性的政策規畫，欠缺多元族群的設計，希望政府看著婦女老幼、多元性別和障礙者等等的無仝需求。

婦女新知基金會秘書長 覃玉蓉
防空避難所伊是因應緊急狀況然後愛入去覕的毋過彼是收容避難所其實可能伊其實比如講你的厝已經無地轉去矣收容避難所可能就會需要一寡無障礙設施這个隱私佮安全對女性佮少數性別 閣有囡仔其實是非常重要的

也有民團指出，親像有身的婦女、抑是有幼囝的家庭，若是拄著物資無通進口的時，包括醫療用品、日常物資攏會欠，尤其幼嬰的牛奶粉攏是進口的，遮的平常時著愛先攢起來。另外，婦產科醫護咧戰時恐驚嘛真僫揣，民團呼籲政府愛盤點多元的支援人力，包括助產師、陪產人員等等。

台灣生育改革行動聯盟祕書長 陳玫儀
真濟烏克蘭的婦女其實是無通佇病院生產的按呢伊可能著愛佇避難所去進行生產所以我認為相關的避難所嘛愛有一寡簡單的生產的設備比如講消毒設備簡單的比如講胎心監測等等這類這寡基礎的 基本的設備可能攏是愛先準備好的

民團嘛表示，未來物資若是照「台灣全民安全指引」以家戶為單位予里長發放，戰時無通保證民眾攏通提著物資，呼籲通比照新冠疫情，提證件領喙罨的做法。另外，民團嘛建議政府會當參考這份政策建議書，針對無仝族群來規畫安全指引和民防政策，強化社會韌性。

記者 呂尚儒 王志剛 臺北報導