27%女性捌拄過有身歧視 勞動部欲擴大檢查
加入公視會員，
按讚收藏你關注的報導
發布時間：
更新時間：
臺灣面臨少子化的問題，政府也有提出鼓勵生囝的措施，但是願意生的人也是無濟，根據勞動部的調查顯示，無願意生囝的因素，除了經濟狀況，職場的有身歧視也是原因之一。根據勞動部調查，實際上也有二成七的女性佇工課場捌拄過有身歧視。為著改善這个狀況，勞動部表示會佇明年來擴大執法，也會提出獎勵措施，鼓勵友善企業。（新聞標題、導言及內文皆為台語文）
頂年新北市三重發生一件一口灶三个人不幸死亡的案件，頂日仔檢方調查結果出來，是因為媽媽有身、受歧視、予人辭頭路，最後規家伙仔因為經濟壓力，才造成悲劇。雖然性別工作平等法有規定禁止歧視有身的女性員工，但實際上隱形的有身歧視猶是存在。
臺灣生育改革行動聯盟理事 李佳欣：「（媽媽）一下有身就開始揣頭路，因為怹已經聽著職場的人講，你今仔日如果請育嬰假轉來，就是予人調去其他的縣市去工作。」
勞動部上新的調查結果，發現有五成的女性，感覺工課場對有身的員工無友善。實際上也有二成七的女性，佇工課場捌拄過有身歧視。為著改變這个狀況，勞動部表示，會來擴大勞動檢查，也會提出獎勵措施。
勞動部長 洪申翰：「來做專案有身歧視的公佈，如果予阮（勞動部）開罰，是有身歧視的問題，我想阮絕對袂幫忙隱瞞，一定會予社會知影，這个企業猶是有有身歧視的問題。」
根據勞動部統計，最近3年因為有身歧視的裁罰案件，有46件，罰金有1215萬，為著消除工課場歧視，未來也會明確公佈違法企業有身歧視的型態，另外針對友善企業，也會頒獎表揚予逐家知。
記者 陳心彤 王志剛 臺北報導
唐嘉良/編輯
