台文繪本《歇睏的光》 溫柔詩句關懷心理狀態

臺文繪本《歇睏的光》：「彼暗，心失電矣。稀微的夢嘈嘈滴，每一工攏親像，予滾水沖幾若擺去。」

用「失電」來比喻咱人，總是會有無氣力拍拚的時，有心情較烏陰的時，這是作者黃立佩的頭一本台文繪本《歇睏的光》，是一本關照心理狀態的台文繪本，嘛是目前市面上較罕見的類型。佇作者創作的過程，陪伴伊10外年的狗仔拄好轉去天頂，黃立佩也共畫佇封面，透過溫柔的詩句，疼痛需要歇喘的心理狀態，嘛寫出濟濟人等待靈魂重新透光的過程。

聯經出版編輯部童書組主編 詹倩宜：「《歇睏的光》是針對大人，伊的心內處境來寫的。所以阮咧設計這个冊的時陣，阮是希望會當有閣較創新的思考，會使予閣較濟人用家己的母語，對家己的心來講話。」

有諮商專業的醫生嘛表示，其實咧醫療現場，語言的使用對安定心理有幫助，也指出現代社會的緊張，定會有逐人袂著的壓力，有當時仔愈想就愈煩惱、愈peh袂起來。伊認為肯定咱人有軟汫的時、有暫時無力量的時這真重要，醫生表示，若咱接受家己需要歇睏，按呢就對重新出發有幫助，伊認為這種心理繪本也通予咱力量。

台灣安寧緩和醫學會理事 謝宛婷：「咱定定共歇睏當做講就是無骨力，共歇睏當做是無能力，其實彼攏毋是。咱若開始歇睏，咱若接受講，這馬咱就是可能無彼个力量，彼就對咱欲行後一步的準備伊就有幫助。」

有時星光、有時月明，醫生肯定繪本，用柔軟的詩句書寫對烏暗漸漸透光，無仝階段、無仝角度的心理狀態，出版社表示，這也是怹頭一本針對大人出的台文繪本，希望通療治現代人緊張、不安的心。

記者 呂尚儒 莊浚佑 新北報導