店家予猴搶食 農業局囥籠仔掠著2隻送動物園

鼓山這間早頓店共做好的早頓囥佇門口的架仔頂，原底是欲方便人客來買，毋過這工來的毋是人，是一隻、兩隻，攏總四隻猴，等到店員看著出來趕已經規个捙倒擔。附近民眾講，這站仔攏固定有兩隻猴走來遮賴賴趖，除了早頓店，超商嘛是予猴舞甲無法度，逐家去揣市府鬥相工，囥籠仔張猴。

當地居民 林小姐：「開始是看著一隻，後來就兩隻；閣隔一禮拜，就閣聽講是四隻，毋知影。毋過目前已經掠著兩隻矣。」

當地居民 王先生：「可能伊掠著嘛是放轉去山頂，抑是動物園遐去啦，這馬嘛是閣咧保護當中矣，嘿啊、嘿啊。學校的猴山嘛一直咧往市區走。」

囥遮大跤的籠仔大肆機咧張猴，原底閣予人誤會是民眾家己囥的。農業局講，雖罔台灣猴毋是保育類的，毋過猶是袂當烏白掠，只會當由公部門來處理，今年攏總掠著26隻，掠著會先送動物園，才閣揣時間放轉去山頂。但是保育團體認為，這是治標無治本的做法，應該愛建立人佮猴正確的相處觀念，才是正範。

台灣獼猴共存推廣協會秘書長 林美吟：「阮做一个像猴山社區這款的感覺，阮逐家講咱食物盡量莫提出來，窗仔門逐家愛巡予好，塑膠袋仔盡量莫用按呢，成做一个居民意識。」

高市農業局植保科長 郭明欽：「若有相關的需求嘛會當敲1999，由本局協助派人去，設誘捕籠仔，協助怹掠抑是共趕走。」

保育團體強調，台灣猴是母系社會，猴公大漢會離開原底的族群，去揣新的所在，農業局放這隻轉去會閣換一隻來，欲解決問題就愛學會曉，愛按怎佮猴和平相處。

記者 許嘉茹 邱紹揚 高雄報導