第44屆行政院文化獎 楊麗花、傅明光、吳晟著獎
發布時間：
更新時間：
文化部今仔日公佈第44屆行政院文化獎的著獎名單，攏總有三位，包括歌仔戲國寶楊麗花、客家建築師傅明光、猶閣有農民文學作家吳晟，行政院文化獎屬個人終身文化成就獎，是國家上懸的文化榮譽獎項。文化部表示，今年的頒獎典禮，拍算辦佇7月初10，會由行政院長頒獎。（新聞標題、導言及內文皆為台語文）
歌仔戲國寶 楊麗花(2025.2.22)：「身騎白馬，走三關，我改換素衣，回中原。」
楊麗花是臺灣歌仔戲的傳奇國寶，今年81歲，伊的藝術性命，會使講是臺灣歌仔戲的發展史。尤其1960年代以後電視歌仔戲真興，楊麗花的小生扮相是濟濟人的世紀初戀。伊的作品對廣播、電視到電影攏有，國內外攏有戲迷，嘛栽培濟濟人才。因為楊麗花對臺灣文化有真大的貢獻，嘛予伊得著今年行政院文化獎的肯定，伊的徒弟陳亞蘭表示，楊麗花到今嘛猶真掛心欲予歌仔戲通繼續傳承落去。
歌仔戲演員 陳亞蘭：「歌仔戲是欲按怎，閣予咱的後代、後後代，繼續按呢萬年久遠傳承落去？伊認為講這个電視歌仔戲，一定愛會當閣再出現。」
文化獎的著獎者，猶閣有農民文學作家吳晟。吳晟1944年佇彰化出世，伊的文學關注農民和土地，嘛探討社會變遷。吳晟講家己50歲以前，因為臺灣需要民主和教育的改革，積極參與黨外運動，毋過伊講家己是農業專科畢業，閣是農家子弟，伊認為土地才是人的根本，50歲以後到今81歲，伊注心推廣保護樹欉和環境永續，吳晟嘛希望未來政府積極投入自然環境的保護。
作家 吳晟：「咱講極端氣候，溫度一直衝懸；咱講無土地無文學啦；咱種樹仔一定就是講，愛種著所在、種著樹種、有一个好的管理。」
行政院文化獎屬個人終身文化成就獎，是國家上懸的文化榮譽獎項，今年攏總有三位著獎者，除了楊麗花、吳晟，閣有客家建築師傅明光，文化部表示，怹是咧傳統藝術、文化資產佮文學領域有重要的貢獻，拍算今年的頒獎典禮欲辦佇7月初10，咧臺北市中山堂舉辦，會由行政院長頒獎章、證書佮獎金100萬。
記者 呂尚儒 莊浚佑 臺北報導
唐嘉良/編輯
