臺北國際冊展「公民冊區」 NGO提倡公民議題

民間司改會發展資源經理蘇建和：「彼寡受害的人，阮看會著的人，目前猶咧救援的人 咱敢是愛正視𪜶。」

咧民間司法改革基金會做穡的蘇建和，過去捌是冤案的主角，是無罪定讞了後，才決定投入司法改革工課。蘇建和1991年牽涉一條命案，經過幾若擺予法院判死刑，落尾才佇2012年得著清白，無罪定讞。拜六伊佇臺北國際冊展，分享這段過去。

民間司改會發展資源經理蘇建和：「重要是因為家己的經驗，家己的經驗發覺講，我進前就是攏無關心（司法），（別）人嘛袂關心嘛，講，啊你這去予人冤枉，佮我有啥物底代，其實咱社會責任是重要的。」

這場講座是咧臺北國際冊展的「公民冊區」舉行，對2017年開始，就有濟濟NGO團體做伙，會佇逐年的臺北國際冊展排擔；今年參與的NGO團體真豐富，除了司法改革，是包括轉型正義、性別、勞權等等領域，欲予民眾踅冊展，也了解公民議題。

台灣勞工陣線副秘書長楊書瑋：「倡議毋是只干焦去街仔路，閣有足濟方法，其實咱臺灣的NGO攏有足濟的出版品，臺灣多元文化的部份，會使透過這改的冊展，予逐家看著這个部份。」

負責規劃公民冊區的台灣勞工陣線講，真濟民眾對NGO的印象，就是對電視看著𪜶咧行街頭，但是其實做議題倡議，閣有真濟方式，嘛會當逐家坐落來好好仔講，𪜶希望予大眾看著NGO議題倡議的無仝面向。