野球世界12強臺灣冠軍 臺博館展出拚戰故事

金爍爍的世界12強棒球賽冠軍獎盃，對箱仔提出來，囥到展覽台頂。11月臺灣隊，佇世界12強棒球賽得著冠軍，這是臺灣閬32年，閣再進入成棒世界級賽事，這个冠軍也真受臺灣民間關注，棒球的幕前、幕後工課攏成做熱門討論話題。職棒大聯盟等等單位也共這擺得著冠軍的過程，自元旦開始欲佇臺灣博物館用展覽來呈現。

中華職棒大聯盟會長蔡其昌講：「我感覺這个榮耀應該分享予逐家，這已經毋但是棒球箍仔的代誌，這是臺灣共同的記持、共同的榮耀，所以我認為無應該只是佇咧棒球迷之間看待這个冠軍獎盃。」

世界12強棒球賽臺灣隊總教練曾豪駒講：「每一位球迷入來博物館的時，看著的毋但是這項物件，是每一个球員in佇球場奮鬥的精神，每一个故事攏真有意義。」

回顧2024年，臺灣運動圈有真濟大事代，親像巴黎奧運咱臺灣代表隊得著2金、3銅的好成績；帕運臺灣代表團也得著3塊銀牌、2塊銅牌；到年底的世界12強棒球賽冠軍。蔡其昌講，毋但是棒球，全臺灣攏真有光榮感。總統賴清德也承諾，會共臺灣隊囥起去臺灣的貨幣。

總統賴清德表示：「真濟球迷希望講共500箍，國小棒球隊、冠軍棒球隊大漢矣，變做咱12強的冠軍棒球隊，我會予這个代誌實現。」

總統賴清德承諾，未來毋但會推出世界12強棒球賽的冠軍紀念幣，另外嘛拍算共目前紙票的500箍也進行改版。另外蔡其昌講，未來按算佇臺灣各地，也揣適合的場地展出冠軍獎盃，共榮譽分享予民眾。