烏熊學院捍衛主權 高雄行去臺北「接力護臺灣」

民間團體烏熊學院發起「接力護臺灣」的活動，欲用行路的方式，表達守護臺灣民主的立場。今仔日（12/4）日時，隊伍行到彰化，有袂少支持民眾到現場相伨，大聲喊出保護臺灣的決心。

民眾佇彰化火車頭頭前，大聲喊出守護台灣的口號，由民間團體「烏熊學院」發起的接力護臺灣活動，11/30對高雄出發，欲用九工的時間行到台北，拜三（12/4）日時隊伍行到彰化市，雖然天氣燒熱，但是支持者表示，逐家仝心團結守護台灣的感覺真好。有民眾表示：「鬥陣的人來行這逝路，咱感覺足歡喜、嘛感覺足有信心的。」、「希望我會當用我家己的力量，共臺灣的自由民主用阮的雙跤傳落去。」也有民眾講：「足濟資料咱看著的、聽著的，攏無一定是正確的。咱這个活動出來外口按呢守護臺灣行一輾，可能佇路裡拄著足濟無仝意見的人，就會當互相討論。」

烏熊學院表示，中國這幾年不時用各種手段壓迫臺灣，希望透過群眾的力量，提懸民間防衛的意識，表達捍衛臺灣主權的決心。接力護臺灣的領隊陶漢表示：「主要是欲向社會佮國際宣告臺灣人抵抗的意志，臺灣人並無失志，臺灣人會保護家己的土地，袂向強權投降。臺灣人已經做好準備矣。」

主辦單位表示，沿路有袂少自發性加入的民眾，有人家己製作標語、攑旗仔聲援，徛出來守護台灣。目前路途已經行一半，預計佇12/8這工行到上尾站臺北，完成380公里的接力步輦行動。最後佇臺北華山園區，用人陣排出英語「Defend Taiwan」，向世界展現台灣人守護台灣的決心。