行人優先區嚴重超速 上重罰3萬6、吊牌6個月

內政部通過「行人交通安全設施條例」定出、行人優先區內面、車輛限速20公里，若超速就會當罰千2到2千4，超過40就算嚴重超速，會罰萬2到3萬六，閣會吊牌6個月。新政策10月施行了後，目前新竹縣按算規劃佇議會到警察局之間，185公尺長的路段推動。這嘛會是全台灣頭一个行人優先區。

車輛經過縣府頭前，駕駛攏會專工共速度放慢、毋敢駛緊。內政部十月實施行人優先區，共設置權力交予地方，新竹縣政府目前按算共縣議會到警察局之間的路段，規劃做限速20公里的行人優先區，煞引起民眾有無仝的意見。

民眾表示，「我感覺遮限速20公里無合理，尤其是(附近)竹北交流道，若是窒車、足濟縣政府的人欲來上班，遮有一個大停車場，對彼爿一直窒來到遮，限速20公里了後，車全部攏會窒到交流道彼爿。」

民眾嘛講，「時速20公里傷譀，人若是行較緊、就會超過20公里。」

閣有民眾表示，「我感覺合理，因為遮有真濟人出入，車攏應該愛駛較慢。」

新竹縣交通處指出，因為這个所在、附近攏是行政區域，有袂少來辦公的民眾咧出入，所以才會選擇共遮規劃做行人優先區，上慢明年六月進前、就會開始實施。

新竹縣交通旅遊處副處長張淇銘強調，「按算佇縣府附近的行政區內的道路，來設減速標線、減速丘，以及行人穿越線等等，來限制駕駛人的駛車速度，提升行人安全，車輛限速是20公里，路口嘛會增加，一寡行人優先標誌，工程發包時間是明年2月，完工的時間大概是會佇6月。」

交通處提醒民眾，未來只要看著這藍底白字的行人優先區標誌，限速就是20公里，目的是欲保護過路人的安全，若超速，上重會罰2400，希望共同創造友善行人的交通環境。