中文注音符號新設計 「精靈文」當熱、引起話題

最近出現一種字體、叫做「精靈文」，若像歐美國家的文字，毋過詳細共看、其實是中文的注音符號。有人認為注音干焦臺灣才有、感覺誠趣味；嘛有人認為注音符號、是往過國語政策、打壓本土語言的工具，兩派講法攏有人支持。
 

共中文字拍起去，就通看著有若像歐語國家的文字走出來，詳細看其實是中文的注音符號，這个字體就號做「精靈文」。設計師本身是字體的書法家，透過佮字體公司的合作發表，強調這是「台灣人才捌的注音」免費公開予民眾抑是商業使用，最近佇網路討論甲真熱，煞也意外出現注音符號的論戰。

字體設計師表示，「其實阮這幾工過嘛有較冷靜，因為其實這寡聲音內底，我感覺大部份，其實是煩惱臺灣人無夠注重家己的母語。」

開發字體的justfont公司長期佇罕得有人關注的台語文、客語文等等，開發濟濟漢字和羅馬拼音的字體，創辦人表示雖然注音符號是外來的物件，毋過伊認為共外來元素吸收做咱家己的，是咱臺灣的韌性，嘛是行向未來的方法。

justfont創辦人葉俊麟講，「我感覺莫去攻擊對方，因為咱足濟文化入來，咱欲按怎麼用包容的態度，去融合無仝文化到咱本身，這才是咱真正文化自信心的展現。」

有學者指出一寡伨注音符號的人，是因為伊通呈現臺灣人的特殊性，成做身份認同的一部份。另外，無佮意注音符號的人，學者認為是因為往過政府的國語政策，就是用注音符號強勢推行華語，打壓本土語言。學者認為這款立場的衝突，有當時仔是認知無仝、對歷史無夠清楚所造成的。

臺師大台文系教授劉承賢表示，「有淡薄仔像講過去就是這支刀仔，因為這支刀子咧共阮ﱢ，所以這馬支持注音文的人，in當然是出佇好心，in感覺講用注音全世界干焦臺灣咧用，中國華語也無用注音，這會當突顯臺灣的特殊性，逐家無仝款的認捌的時陣，就感覺講足濟情緒敢若是無來源的、無理由的，若是逐家有共同的了解的時陣，我感覺才有彼个對話。」

學者嘛這款討論上深層的價值，其實攏是向望揣出，通強調臺灣的獨立性佮特殊性的元素，透過討論嘛通深化對臺灣的認捌。