鼓勵民眾勇敢發聲 勞動部拍影片推工作平權
發布時間：
更新時間：
為著予加強民眾佇工課場的平權觀念，勞動部今年特別用、原住民族群佮有身婦女、這兩个概念、來拍影片，想欲用戲劇的方式倚近民眾，予民眾了解著、若是遭受無平等的對待，愛勇敢徛出來，雇主、勞工也愛互相尊重，希望逐家做伙來重視工作平權的議題。（新聞標題、導言及內文皆為臺語文）
為著予加強民眾佇工課場的平權觀念，勞動部今年特別用、原住民族群佮有身婦女、這兩个概念、來拍影片，想欲用戲劇的方式倚近民眾，予民眾了解著、若是遭受無平等的對待，愛勇敢徛出來，雇主、勞工也愛互相尊重，希望逐家做伙來重視工作平權的議題。
勞動部影片「你就是自己的光」，是咧講原住民因為身分佮文化無仝，常在佇工課場予人歧視，今年勞動部特別以「你，就是自己的光」做主題，拍影片加強宣導民眾佇工課場的平權意識。勞動部向望透過影片，鼓勵逐家佇工課場攏愛無分族群、年齡、性別做家己的光。
勞動部影片「你就是自己的光」當中，「我欲將我工課上所學著的一切，我欲家己設計、家己品管、家己監工，我欲親手佇彼塊地，起一間屬於咱家己的厝。」
故事上尾講著原住民後來佇工課場揣著自信，揣著家己的光。另外，根據勞動部的統計，性別平等工作申訴件數內底，受審理的件數111年是381件，112年增加到566件，勞動部強調，佇112年增加較濟是因為me too運動，加上性平三法通過，民眾會主動揣資源、來保障家己的權益。親像有身婦女可能需要兼顧家庭佮工課，這也是真濟婦女會拄著的挑戰。
勞動部次長陳明仁講，「單純宣導的方式，可能會感覺傷教條，所以阮拍算用電影的方式，予逐家透過藝術的欣賞，有法度產生共鳴，有法度達到職場平權。」
勞動部表示，希望用戲劇的方式倚近民眾，予民眾了解原住民佮有身婦女佇工課場平權的觀念。勞動部次長嘛強調，這馬法律有規定若是員工佇工課場受歧視就會食罰，毋過處罰毋是目的，上重要的是向望所有的人攏通受著平等的對待，做伙建立平等的工作環境。
記者 張佳倪 莊浚佑 臺北報導
吳思薇/編輯
