台語文化營傳母語 搬戲、繪本教囡仔認捌地方

囡仔兄搬戲演一隻蠘仔，因為環境污染造成蠘仔跤變色的故事，另外閣有鯊魚隊，勸人毋通食魚翅。這是關懷文教基金會今年的趣味台語文化營活動，教囡仔用台語搬戲，認捌生態保育、地方特色，最後上台表演，發表成果。

參加營隊的囡仔：「逐家做伙耍，做伙搬戲，做伙講台語真趣味。」

tshuā隊老師 陳承佑：「總共有六个隊，總共有三種無仝款的主題，毋過仝款攏有一个核心就是講，予囡仔會當有表演的機會。」

三工的營隊課程，今年活動以生態佮地方特色做主題，用劇場、布袋戲、繪本這三種方式來表演，已經連紲十外冬攏舉辦台語營隊的關懷文教基金會表示，10外年的時間落來，今年有袂少少年輩轉來tshuā營隊，是真好的傳承。

關懷文教基金會董事長 周清玉：「今年特別歡喜就是有真濟學校、台語文系的學生攏來做這个隊員，大漢囡仔tshuā細漢囡仔，閣有專業老師。對台語應該會真順利來推動。」

關懷文教基金會表示，除了透過營隊活動予囡仔人講台語，其實家庭環境嘛真要緊，基金會2018年佇彰化成立頭一个台語文園區的時，就以民間的力量開始咧捒母語家庭認證，毋過干焦一个所在咧做，是絕對無夠的，望政府重視台語文化園區欠缺的問題，也向望眾人做伙加入母語家庭，予台語會當代代傳承。