天馬電台舊地做台語園區 連署2日200人支持

規大片的雜草樹仔生甲真茂，就算出動怪手嘛愛用真濟時間才通整理好勢，遮是佇倚台江國家公園附近的天馬電台，也就是中央廣播電台台南分台，民國106年遷徙了後，機關用地變做文創產業園區地。雖罔濟濟單位按算來遮發展，落尾攏無成，這陣地方連署，欲爭取踮遮設國家級的「台語文化園區」，怹認為無論以文學抑是歷史的角度，這是上適當的地點。

台江十三佃文化工作室鄭新讚講:「台江內海是咱臺灣歷史一个真重要起步的所在，咱臺灣是對西部開始，比論講鹽分地帶一直起去一个廊道仝款，向南向北攏是相當真好的所在。」臺南社區大學校長林朝成講:「(臺南)台語文學的作家有偌濟，通閣做一个專冊，表示咱對日本時代到這馬，咱台語的作家足濟，結合在地的地景佮台語等等，園區來講有法度共遮攏結合起來。」

台江分校執行長吳茂成也指出，長年來怹推捒台江文化參本土教育，攏是為著振興台語文化咧拍拚。目前全台灣干焦一个台語文化園區佇彰化，怹認為政府通愛落實國家語言發展法的精神，佇台江內海營造一个復振母語、國家級的台語文化園區。


臺南市副市長葉澤山表示:「土地是國產署的，所以市政府嘛會參國產署逐家密切合作，有想欲來建設天馬電台的方案，抑是講有想欲來投資這塊相關的提案，阮攏會參國產署遮逐家謹慎做評估。」

地方向望這塊29公頃的基地，規畫做台語文化園區，爭取公視台語台總部南遷，設立國家語言發展中心等等，連署表公告兩工，兩百外人贊聲支持，發起人按算尾手會共公民討論的意見交予文化部。市府嘛回應，會閣參中央合作討論。