電影「八戒」得著金馬最佳動畫 今欲出台語版

「閣按怎毋知輕重，我嘛欲用我這雙手，共上珍貴的物件救倒轉來。」

八戒的角色講台語，而且以科幻的新世界做背景，這是台灣動畫導演邱立偉上新的作品《八戒》，去年才拄提著金馬獎。這个故事雖然是西遊記，毋過是以八戒為主角，上特別的是電影毋但是台語配音、閣用台文字幕。導演講，因為台語配音製作的過程中，看著台文的配音稿，予伊真感動、有新的靈感。

《八戒》導演邱立偉，「阮決定欲配台語的時陣，我第一改看著，咱華文的劇本，去翻做台文，我感覺真正是，予我有新的感動、新的想法，有這个體會了後，我就感覺講，會使用台文做字幕。」

導演講，其實伊家己是台南囡仔，台語是伊的母語，毋過因為細漢的時陣經歷國語政策，加上家己以早長年佇國外讀冊佮做工課，這馬台語是講甲離離落落，這改透過做台語版本的電影，予伊重新熟似台語，所以嘛希望透過這齣電影來推廣台語主流化。

《八戒》導演邱立偉，「聽是攏聽有，講是攏予人笑，所以我嘛想欲共，台語主流化這个運動，藉著這改機會宣傳出去。」

台語配音的動畫片這幾年愈來愈濟，會當佇電影院看著台語字幕的台灣動畫，《八戒》會當講是頭一齣，導演表示，台語版難起來有無仝的感受，望民眾行入電影院，看台語氣口的西遊記，聽八戒講台語。