今仔日是5月初1勞動節，嘛是勞工團體--台灣勞工陣線，成立40周年的日子。這40年來，in為台灣勞工爭取一禮拜會當歇兩工和勞工保險、退休金等等，嘛促成工會子法，這馬台灣才有濟濟工會組織為台灣勞工發聲，為著欲予大眾了解遮濟年來勞工運動的歷史意義，in辦一个特展，嘛向望透過往過的影像、文獻、史料，來啟發社會對勞動議題的思考。（此則新聞標題、導言、內文皆為臺語文。）
多數勞工一禮拜會當歇兩工，有勞工保險、和退休金等等，這攏是臺灣勞工上蓋基本的權利，遮的攏是濟濟勞工團體，久年來和政府拚氣力、上街路抗爭爭取來的。其中臺灣上早的勞工團體「臺灣勞工陣線」，自戒嚴時期1984年5月初1成立到今，佇勞工議題已經拚40年，拜三佇勞動節這工辦特展，希望予大眾了解勞工運動的歷史意義。
台灣勞工陣線副秘書長 楊書瑋，「臺灣的勞工運動，其實是佮台灣規个民主佮社會變化，去做一寡改變，包括講勞陣一開始，是來做勞工爭議的部份，後來閣做工會自主化，這馬來做政策倡議的部份。」
臺灣勞工陣線成立以來，協助過濟濟勞工處理勞資爭議，嘛推動工會自主化，催生臺灣各地的工會組織來替勞工發聲。現任勞動部長許銘春，和往過捌做過勞工委員會主委5年外的陳菊，攏來參加特展開幕記者會，也分別針對勞動議題發表看法，表示除了愛愈重視移工的勞動權益，未來的勞動部長嘛愛看著臺灣勞工咧國際競爭的困境。
勞動部長許銘春，「勞陣一直注重國際人權，阮嘛愛想一下仔，這寡移工咧臺灣，咱會當加為in做啥物，所以咧勞動人權面頂，阮一路攏共勞陣當做友伴，我想咱未來王司長嘛會佇遮和勞陣，做伙來關懷所有勞動的權益，逐家是友伴，會做伙為勞工爭取閣較好的權益來拍拚。」
國家人權委員會主任委員陳菊，「佩珊因為伊是長期、過去咧勞動法案的修訂面頂，大概攏有和伊接觸過，新部長一定愛有愈濟超越，愛愈了解今仔臺灣的勞工，咧面臨國際競爭，in所拄搪的真濟困境，伊攏著愛好好仔，未來佮勞工溝通。」
臺灣的勞工運動，和咱的經濟、社會發展一直攏有真峇的關係，勞工陣線對上早的法律支援到發起社會運動，到今猶繼續為臺灣勞工，向政府提出濟濟勞動政策建議。這个勞工運動特展辦佇臺北的新富町文化市場，對5月初1開展到初8，嘛希望會當啟發社會對勞動議題的思考。