「行人交安設施條例」三讀 電箱、批桶擋路罰15萬

狹狹的人行道中央，去予路燈擋牢咧，過路人根本無所在通行。拜二立法三讀通過過路人交通安全設施條例，按算進行排除人行道障礙物、改善路口交通設施、予行路的環境通相連等等措施。民眾對這擺立法通過是真歡喜，表示平常時行佇路裡，毋但不時有懸低差，也定定會去拄著障礙物，為著欲閃過，有當時仔愛行甲真倚大路，有較危險，這馬有法律來加速過路人環境的改善、訂定處罰，in是攑雙手贊成。

民眾 蔡小姐，「我是絕對贊成，有當時仔會捒一个序大行，閣愛佮伊捒落來，閣有懸低差、序大愛閣起來，希望政府緊共遮的物件改善，通予道路較安全淡薄仔。」
民眾 劉小姐，「我是感覺會當較闊寡，因為以後若有小朋友，捒奶母車會較方便。」

立法了後，後擺若路裡有電箱、批桶等等去阻礙過路人的公用設施，地方政府需要去協調徙位，無佇期限內改善，上懸會罰15萬。國土管理署認為，這改立法上重要的是予逐家閣較重視人行道的設立。

國土管理署都市基礎工程組組長蔡亦強，「一步一步改變國人對道路的想像，阮會要求改善了後的人行道，伊的人行道愛有1.5公尺闊。」

內政部表示，法律通過了後，地方應該愛舉辦說明會，和在地民眾討論優先改善的項目，內政部也希望中央和地方做伙合作，佇2030年進前減少百分之五十的行人死亡率，進一步達成2050年「行人零死亡率」的目標。