南二線南洋杉樹頭被斬斷 公所：驚倒去出意外

迵往臺南北門雙春濱海遊憩區的南二線，每若經過通看著雙爿路邊有青錦錦的南洋杉，這陣有十幾欉樹仔，予人斷頭式的修剪。實際到場，在地里民無奈地提出舊年風颱天南洋杉搧倒佇路邊的相片，原來是影響著里民性命財產安全，尾手由公所來處理的。毋過，煞引起民眾討論，有人認為樹頭全無去，影響城市景觀無理想。

民眾，「真離譜啦，我進前經過的時陣遐个樹仔足濟，毋過這馬看相片我驚著，全部樹仔賰一半。」

在地居民李先生，「風颱天抑是風大，我敲幾若遍去予公所，叫in較緊出來鉅的，無暗時仔漁民騎過去，攏造成有人受傷過。」

釣魚場業者陳先生，「出入若去摃著欲按怎，欲叫啥人來負責，我這嘛摃歹去嘛攏無賠償。」

區長講，會按呢生主要是南洋杉無像其他樹仔通修樹身，IN才會修剪樹的懸度。另外，因為北門倚海，土壤鹽分懸，久來造成植物無好湠根，每若東北季風，樹仔根本堪袂牢。在地里長無奈地表示，無整修袂使得，有的厝後壁嘛種樹，恐經連厝頂嘛會槓歹去。

臺南市北門區雙春里長 李連興，「安全一定愛共人顧的，毋是美觀、美觀是愛著，毋過若無(修剪) 若倒落去，像我舊年就通報九欉。」

臺南市北門區長張政郎，「南洋杉會一直生長，會使生甲三四樓懸，會變成頭重跤輕啦，變成有一寡風來就足ﰈ倒去。」

種樹雖然美觀，毋過愛考慮周邊的環境。像這種大欉的南洋杉若不幸倒去，毋是三四人來拎就有法度徙振動。在地人喊聲，向望政府注重人民的安全。