圖書館「臺語講古」7成講華語？ 母語家庭真失望

因應文化部鼓勵台語主流化推出濟濟補助，各地開始有愈來愈濟台語的活動，無論是劇場抑是講故事等等，活動真多元。毋過有家長分享講，最近in囡仔去圖書館，參加台語活動，煞干焦佇演出的時講台語，其他的互動對話有七成攏講華語，伊感覺真失望。

民眾 王先生，「介紹遊戲的過程嘛是，大多數用華語來進行，所以一方面我是感覺講真無彩，我是感覺講ﰀ咧教，阿公、阿媽、阿姊、阿兄遮的語詞，抑是講菜市仔買著的菜，台灣話欲按怎講，對阮(台語)家庭來講，有小可仔較簡單啦。」

這个代誌也佇台語家庭的群組引起討論，一寡台語家庭的家長表示，ﰀ佇各地圖書館聽台語講古，嘛感覺品質真無穩定。台語團體認為講，這應該愛培訓圖書館的志工來加強講故事的鋩角和台語意識。抑若關注台語議題的民進黨立委陳培瑜，是表示未來會提案建議佇各地設示範館，互相鼓勵求進步。

台灣台語路協會理事長董力玄，「阮有足濟家長，其實足濟家長會ﰓ囡仔去參加英語的活動，英語的講師嘛用全英語咧ﰓ活動，但是下跤囡仔可能嘛聽無，但是英語，譬如講咱會使用趣味的活動，用互動的方式，予囡仔聽有，知影講彼个老師咧講啥物，台語嘛仝款。」

民進黨立法委員陳培瑜，「你若有揣著專門的老師，抑是伊有經過一寡訓練佮教育，伊咧講故事的時陣，伊會使顧著故事的情形，閣會使顧著講，咱欲按怎佮現場的囡仔講母語的部份，我感覺咱若揣一寡示範館，就是遮的預算咧補助的時陣，人才會感覺講，按呢你文化部做的代誌才是著的。」

立委陳培瑜嘛強調，政府咧做台語推廣毋是干焦掖錢就好，伊表示這部份伊嘛會繼續加強監督和檢討。另外，最近一寡台語團體嘛有針對台語的發展和困境，來拜會陳培瑜討論長期的規畫。伊表示，未來有拍算欲提案修國家語言法的子法，訂出詳細的原則，來解決濟濟實務上台語推廣的問題。