高雄1女性掖米飼鳥仔汙染環境 環保局：通罰千2
發布時間：
更新時間：
高雄鳳山最近出現一位查某人，定定提著飼料佮米掖佇社區的塗跤或者是停車場，唌鳥仔來食。毋但造成社區環境垃圾，鳥仔屎也放甲滿四界。這款的行為恐驚已經犯法，會使罰款，目前里長也貼單警告，請伊毋通閣烏白掖。（此則新聞標題、導言、內文皆為臺語文。）
監視器畫面會當看著，一位查某人手提袋仔行到對面，就共物件掖佇塗跤，除了這爿，伊閣會去對面停車場掖甲規四界，伊的行為造成鳳東里里民困擾，因為這位查某人四界掖飼料已經兩三工，定定唌鳥仔來食，也造成環境垃圾，里民表示，最近社區的鳥仔確實有變濟，上歹處理就是鳥仔屎。
居民，「環境會汙染，著啊，而且鳥仔屎，鳥仔屎其實是足毒的。」
居民，「親像飼動物，伊就會變成群聚，群聚就會造成家庭的困擾。」
實際來到遮，塗跤確實閣有一寡鳥仔的飼料，里民為著趕鳥仔，步數真濟，親像有人將光碟片掛佇陽台，也有人用塑膠袋仔將機車包牢的，防止鳥仔屎滴著，針對這位民眾的行為，里長已經貼出公告，警告伊莫閣烏白掖。
高雄市政府環保局稽查科科長王健州，「掖飼料佇人行道汙染地面，影響環境衛生，查著汙染行為人了後，以違反廢棄物清理法第27條規定，罰千2到6千箍罰款。」
環保局表示，這位查某人看起來是誠有愛心咧飼鳥仔，毋過已經違反廢棄物清理法，會當罰一千二百箍到六千箍，民眾會使向環保局檢舉。
洪家馨/編輯
